Aukra får lokalavis

Aukranytt blir namnet på den nye lokalavisa som skal dekke Aukra kommune. 

Det er Tvisyn AS som har gleda av å kunngjere oppstarten av ei ny lokalavis på Aukra. Avisa vil dekke lokale nyhende og hendingar både på nett og med ei månadsutgåve på papir.

– Vi ser fram til å introdusere Aukranytt til innbyggjarane i Aukra. Avisa skal vere relevant, påliteleg og engasjerande for lokalsamfunnet med god lokal forankring, seier Robin Røkke, dagleg leiar i Tvisyn AS.

Røkke leiar arbeidet med å etablere avisdrifta i Aukra, og vil vere til stades under næringsdagen i Aukra den 14. juni for å presentere prosjektet. 

– Aukra fortener si heilt eiga lokalavis, ei avis som speglar lokalsamfunnet og gir ei stemme til folket. Med Aukranytt ønskjer vi å byggje ei førsteklasses avis som dekker alt frå lokalpolitikk, kulturarrangement, sport og næringsliv, seier Røkke.

Aukranytt vil lansere ei nettavis, og den første papirutgåva vil kome ut i august. Tvisyn AS vil kome tilbake med meir informasjon til dei komande abonnentane og annonsørar.

Aukranytt blir den femte avisa til Tvisyn i Møre og Romsdal. Dei andre er Hustadvikingen - som vart starta på same vis i fjor- , Vestnesavisa, Øyblikk og Midsundingen. Tvisyn har også aviser andre stadar i landet. 

–A ukra har lenge vore på kartet som ein svært aktuell plass å starte opp ei avis, det er eit klart behov for eit lokalt medium. Då vi i tillegg vart kontakta av folk frå Aukra og fekk støtte frå næringslivet ved Aukra næringsforum var det berre å trykke på knappen, seier Røkke. 

For meir informasjon, kontakt:

Robin Røkke

dagleg leiar Tvisyn AS/styreleiar Aukranytt AS

rr@tvisyn.media

‭91 52 42 36